Shanhaı qor bırjasynda «Samuryq-Qazyna» ulttyq ál-aýqat qory» AQ-nyń Investor kúni ótti. İs-shara Qordyń 215 aktıvin básekelestik ortaǵa berýdi qarastyratyn Jekeshelendirý baǵdarlamasyn júzege asyrý aıasynda ótkizildi.
Qordyń energetıka, kólik pen logıstıka, taý-ken jáne munaı-hımıa salalaryndaǵy qorjyndyq kompanıalary ókilderi qytaılyq kásipkerlerge Qazaqstanǵa ınvestısıa salý múmkindikteri, kompanıalardyń damý qarqynyna baılanysty básekelestik artyqshylyqtary, óńirlik jáne jahandyq naryqtyń sharttary jaıly keńinen baıandady.
«Qordyń jáne onyń qorjyndyq kompanıalarynyń damýy Qazaqstandaǵy oń ózgeristerdiń negizinde júzege asyrylýda. Úkimet memlekettiń ekonomıkadaǵy úlesin azaıtyp, ondaǵy jeke sektordy belsendi túrde keńeıtýde jáne ekonomıkany jańǵyrtýda zor tabystarǵa qol jetkizýde. Men bizdiń qytaılyq áriptesterdi «Samuryq-Qazynanyń» munaı men gaz, kólik pen logıstıka, taý-ken men telekomýnıkasıa salalaryndaǵy jobalarǵa belsendi túrde ınvestısıa salýǵa shaqyramyn», - dep atap ótti «Samuryq-Qazyna» AQ Basqarma tóraǵasy Ahmetjan Esimov.
Qordyń 9 iri kompanıasynyń jeteýin İRO arqyly jekeshelendirý josparlanǵan. Bul aktıvterdiń saýdasy 2020 jylǵa deıin kezeń boıynsha júzege asyrylady. Birinshi kezeńde Qordyń «Qazaqtelekom», «Eır Astana» jáne «Qazatomónerkásip», ekinshi kezeńde «Samuryq-Energo» jáne «Qazmunaıgaz», úshinshi tolqyn aıasynda «Qazposhta» jáne «Qazaqstan temir joly» kompanıalaryndaǵy úlesi satylady. Jospar boıynsha eki aktıv strategıalyq ınvestorǵa satylady: «Taý-Ken Samuryq» jáne Qazaq Air.
«TMD elderiniń arasynda Qazaqstan kólemi boıynsha Qytaıdyń ekinshi saýda seriktesi bolyp tabylady jáne ınvestısıalar úshin basymdyqqa ıe. 2017 jyly Qytaı men Qazaqstan arasyndaǵy ekijaqty saýda-sattyq 18 mlrd AQSH dollaryna jetti. Qazaqstan úshin «Bir beldeý, bir jol» bastamasyna qatysý jáne «Nurly Jol» jańa ekonomıkalyq saıasatyn júzege asyrý eki eldiń yntymaqtastyǵynda mańyzǵa ıe ınvestısıalarǵa jáne ınfraqurylymdy salýǵa jańa múmkindikter ashady», - dep atap ótti Shanhaı qor bırjasynyń prezıdenti Hýan Hýnúan.
«Samuryq-Qazyna» basshylyǵynyń pikirinshe, jekeshelendirý – Qordyń damý strategıasyn júzege asyrýda basty rólge ıe. Bul kompanıalar tobynyń básekege qabilettiligin jáne tıimdiligin arttyrýǵa, korporatıvtik basqarý sapasyn jaqsartýǵa múmkindik beredi. Strategıalyq ınvestorlarmen ornatylǵan áriptestik arqyly kásiporyndar úshin jańa tehnologıalar qoljetimdi bolmaq. Búginde Qordyń keıbir qorjyndyq kompanıalarynda jeke aksıonerler bar. Máselen, Qazaqstandaǵy telekomýnıkasıalyq naryqtyń kóshbasshysy «Qazaqtelekom» AQ nemese «Eır Astana» AQ. «Tulpar-Talgo» ıspanıalyq Talgo kompanıasymen birlese jolaýshylar vagondary óndirisin oń jolǵa qoıdy. «Lokomotıv qurastyrý zaýyty» fransıalyq Alstom kompanıasynyń tehnologıalaryn paıdalanyp, elektrovozdardy shyǵarady. Qor ınvestısıa esebinen alynǵan qarjyny jańa jobalar men salalardy damytýǵa baǵyttaýdy josparlap otyr.
Sonymen qatar, «Samuryq-Qazyna» ulttyq ál-aýqat qory» AQ Basqarma tóraǵasy Ahmetjan Esimov Gonkong qor bırjasynyń basshylyǵymen birqatar kezdesýler ótkizdi.
